MI, EJ PALE PATOIS.  

Ch'est ti apa, ch'est ti aman, tous les deux insanne,

Ch'est vous qui avez fait chu qu'ej sus cor à ch't' heure,

J'étos d'el séminche ed carbonier, cheulle d'homme,

Imblavée dins un coron qui sintot bon el sueur.

Pis à l'école, j'ai troé mes culs d' maronne,

In mettant dins m' tiête, avec du français pa d'z'eur,

No bon patois, ch'ti vraimint qui nous arsanne,

Qu' mes taïons i z'ont écrit comm' in fait pousser des fleurs.

T'intinds quand ej pale, ch'te musique qui résonne?

In dirot eune canchon rimplie à coupette ed doucheur,

Et pis i y a ches mots qui guillent comme d' el tarte à prones,

Qu' in fait eune guinsse ed diape à les dire avec ameur.

I y a cheux qui veul'nt parler bourgeos et qui s'étrannent;

Pourtant quand in est d' ichi, in n'est point d'ailleurs,

Adès, si ej vous pale ainsin, point cha n' vous étonne,

Quand ej dis ouais, ch'est mes vieux qui l'ont mis dins min coeur.

                                                                                                                 Roger BAR.